HÁ 5 ANOS FOI ASSIM O HOIJE
LA FIESTA DE LA ASSOCIAÇON DE CAÇA
Todos ls anhos al acabar la caça i las montaries, la Associaçon de Caça i
Pesca de Sendin faç ua fiesta para toda la giente de Sendin.
Ls cochinos brabos que se matórun nas montaries fúrun para ls caçadores i l
pobo coméren. Ye assi todos ls anhos i assi ten que cuntinar. L cumbíbio ye la
cousa melhor que puode haber. Este anho ajuntórun-se mais de 250 pessonas.
L comido para ampeçar,fui guisado de cochino brabo a la moda de Sendin,
acumpanhado cun pomientos de l binagre. Staba ua marabilha. L pan era caseiro i
l bino era de la Copratiba.
Houbo alguns que lebórun bino de la sue colheita i até aparciu un, cun
salada de regahu.
La segunda mesa
L segundo prato fui bitela assada na brasa, cun salada mista. Tamien staba
buona, mal era nun la agabar, fui de grácia, mas staba mesmo a la maneira.
A mi, que habie stado quinze dies pal Porto, soubo-me a almendras. Alhá nun
hai destas cousas.
La terceira mesa
Por fin fui la subrecena, onde nun faltórun las maçanas ( Maçanica tamien
staba alhá ), las peras, las laranjas i outras cousas mais, que you yá nin dei
cuonta. I tamien habie café, mas a la farta, que agora solo ye moda dáren ua
mostra ne l fondo de la chícara. Nun sei quien ambentou essa moda, mas se
calhar ye para poupar auga, que nun ten chobido.
La quarta mesa
Cumo era hora de ir a la cama, inda dórun isque i brande.
La maior parte fui a la cama cun la barria chena, mas alguns quedórun po
lhi a leriar.
Este
testo stá screbido cun l- an ampeço de palabra, a la moda de l mirandés de
Sendin, cunsante la 1ª Adenda a la Cumbençon Ourtográfica de la Lhéngua
Mirandesa.
