Cámara de Miranda de l Douro reduç
díbeda
an mais de 1,7 milhones d'euro
La Cámara de Miranda de l Douro
anunciou die 29, na Assamblé Munecipal, ua reduçon de la díbeda an mais de 1,7
milhones d'euros, apersentando un resultado lhiquido positibo superior a 1,2
milhones d'euros ne l'anho de 2012.
"Este ye l resultado dua séria
política de cuntençon qu'amplicou la diminuiçon de ls custos i perdas i
l'oumiento total de ls probeitos i ganhos", dixe l'outarca de Miranda de l
Douro, Artur Nunes.
L'outarca refire inda qu'houbo ua
buona geston de ls fondos públicos i fúrun retiradas "las gorduras"
de las cuntas de l'outarquia habendo assi un "maior cuntrolo
financeiro".
"Houbo ua maior eificiéncia ne l
cuntrolo de las cuntas públicas, l que mos permite chegar al anho de 2013 cun
trabalho feito, miesmo ne ls tiempos de crise i austeridade que l paíç
atrabessa", sublinhou.
Esta reduçon acuntece nua altura an
que l munecípio sofriu seneficatibos cortes nas trasferéncias de l Stado,
qu'ascénden a quaije trés milhones d'euros an trés anhos, relatibamiente a las
berbas de l Fondo de Eiquilíbrio Financeiro cuncedidas até 2009
"Fui grácias a probas dadas de
cunsulidaçon que fui aprobado l Porgrama de Apoio a la Eiquenomie Lhocal i l
Saneamiento Financeiro, dues ajudas amprescindibles para cunseguir alcançar
l'eiquilíbrio financeiro", acrecentou l'outarca.
Segundo ls respunsables pula geston de
l'outarquia de Miranda de l Douro, fui cunseguido l'oujetibo de pagar a todos
ls fornecedores cun díbedas até 31 de dezembre de 2012, salientado que "nun
hai mimória na stória de la Cámara d'algua beç ls pagamientos a fornecedores
stáren tan regularizados".
"Quando se argumenta que las
outarquias son respunsables pula díbeda i pula çpesa, nós poderemos ser un
eisemplo a seguir dada la reduçon de la díbeda cunseguida", frisou.
Artur Nunes recorda qu'ancuontrou la
Cámara de Miranda de l Douro, an 2009, anho an que chegou al poder, nua situaçon
"absolutamente ruinosa".
"La díbeda declarada de la Cámara
de Miranda de l Douro rondaba 10 milhones d'euros mas 'scundidos' stában mais
trés milhones d'euros, esto ye, la díbeda rial era bien próssima de ls 13
milhones d'euros, dados cunfirmados pul Rebisor Oufecial de Cuntas",
cuncluiu l'outarca.
Depuis de la cunsulidaçon de las
cuntas, pensa-se agora an lhançar "alguns ambestimientos" ne l
cunceilho raiano de Miranda de l Douro.
Sem comentários:
Enviar um comentário